الـمـطبخ تقدمـه "صابرين متولي": الباباز..من مطبخ الشيف شيرين عمر 

الولاد عندي بيحبوة جداااا طعمه راااائع بجد لازم تجربوة ،  والصور هنا بتوضح الخطوات ، ويارب تعجبكم وتتفاعلوا معايا وتقولولي رايكم.

المقادير :

كوب ونص دقيق ،ونص كوب دقيق تاني هنحطة في مرحلة تانية ،نص كوب زبدة سايحة ،4 بيضات ،نص كوب لبن دافي ،معلقة ص بيكينج بودر ،معلقة ص خميرة ،معلقة ك سكر ،فانيليا ، رشة ملح 
الطريقة :

نخلط السكر مع الزبدة السايحة واللبن والفانيليا والخميرة ونقلبهم كويس .
في وعاء تاني نخلط الكوب ونص دقيق مع البيكنج بودر والملح ثم نضيف البيض واحدة واحدة ونخلطهم كويس .
نضيف خليط اللبن والزبدة لخليط الدقيق والبيض ثم نضيف نص كوب الدقيق التاني ونقلب كويس ونغطي العجينة ونحطها في مكان دافي حوالي ساعة ، بعد كدة نحضر قوالب او صينية كاب كيك ندهنها زيت خفيف ونعفرها بالدقيق و منقلبش العجينة عشان متهبطش  ونضع مغرفة في كل واحدة المهم توصل لحد نصها عشان لسة هاتخمر في الفرن وتدخل فرن متوسط 180 لحد ما تستوي حوالي نص ساعة نطلعها نتركها تبرد ونقلبها ونكون محضرين شربات سخن  نعمل ثقوب في كل واحدة  عشان تتشرب كويس ونحط كل واحدة في وعاء الشربات  تتشرب كويس ونشيلها علي حاجة تتصفي زي مافي الصورة ونرجع نشربهم تاني ونصفيهم ونستني لما تبرد ونقسمها نصين ونزوقها بالكريمة من جوة ونحط الطبقة التانية عليها ونزوقها من فوق بالفواكة علي حسب المتوافر عندكم ..وبالف هنا عليكم يا رب .. واللي يعملها وتعجبة يبقي يدعيلي بقى.
لازم الشربات يكون سخن وهي باردة ...
الشربات : كوب ونص سكر مع 2كوب ماية وبعد ما يغلي عصرة ليمون وخمس دقايق وتطفي وتحطي رشة فانيليا ..