الـمـطبخ تقدمـه "صابرين متولي": تورتة المارشميلو ..من مطبخ الشيف نور جاب الله

. ضرورى نعمل حاجة جميلة وشيك جدااا .. ح ننافس النهارده أكبر المحلات وبتكاليف أقل بكتيير  .. وداعا لاستغلال المحلات .
تابعى معايا  الخطوات واحدة واحدة  هاتطلع معاكى تحفففة .. و هتنافسي كمان المحلات المعروفة .. 
ندخل على طريقة الاسبونج كيك وبعدين التزيين .. 
الاسبونج كيك ..

المكونات :

7 بيضة 
فانيليا 
2 كوب دقيق 
كوب سكر 
2 ملعقة كبيرة نشا 
ملعقة صغيرة خل 
ملعقة صغيرة بيكنج بودر 
ربع كوب ماء دافئ

للتزيين :

مارشميلو
وحدات حلوي الفراولة 
بسكويت التراميسو ( ليدي فينجرز)  
كريم شانتي 
شريط أحمر ستان لزوم الديكور

الطريقة :

نفصل الصفار عن البياض ونخفق الصفار مع الخل ونصف كمية السكر والفانيليا ثم نضيف الماء الدافئ ونستمر فى الخفق هنلاقي البيض نفش وزاد حجمه جدا نضيف الدقيق المخلوط بالنشا والبيكنج بودر تدريجيا لصفار البيض ...   نغسل المضرب وننشفه كويس  ونبدأ نخفق البياض مع نصف كمية السكر والفانيليا ونستمر فى الخفق لغاية ما يزيد جدا حجم البياض ويلصق فى الوعاء اللى بتستخدميه . نبدأ بقي نخلط خليط البياض ( المارينج) بالخليط السابق اللى عملناه بصفار البيض بملعقة خشب من تحت لفوق فى اتجاه واحد حتى يتجانس الخليط كله مع بعض . تدهن صينية مقاس 26  بالزبدة والدقيق ثم نصب الخليط فيه وندخلها فرن على درجة حرارة 180 درجة لمدة 40 دقيقة. 
أول ما تخرجيها اقلبيها على شبكة سلك لتبرد تماما وضرورى تكون باردة جدااا عند التزيين ..

طريقة التزيين :

التزيين حسب رغبتك انا استخدمت هنا مارشمللو وحلوي الفراولة وبسكويت التراميسو.  

خطوات التزيين :

قطعت الكيك 4 طبقات وبين كل طبقة سقيتها عصير أو شربات النوع اللى تحبيه بعد.كده حطيت كريم شانتي للحشو وكررت الخطوة دى فى كل الطبقات . بعد كده غطيتها كلها بالكريمة وبدأت الخطوة الأخيرة وهى لزق وحدات البسكويت  زى مانتوا شايفين وربطتها بالشريط وبدأت ارص المارشمللو والفراولة و الكريم شانتي وطعمتها بالفستق المجروش .   
هاا اية رأيكم بقي .. أتمنى يارب تعجبكم
وبالف هنا وشفا.