(مصر حبيبتي ) بقلم جمال القاضي

أنا عشت الحب معاك
مابين شطين
زي حبيب وحبيبته
وكان اوصاف الحب مابينهم
شطين للحب
الشط الاول
لاقيتك فيه وقابلتك
وكان توقيته فجر نهار
كان فيه من قلبك
ورود للحب وكمان أزهار
راسمه من زهو الوانها
كتير الوان
وكان على وجه طبيعتك
اللون الأخضر
لون اثوابك
واللون التاني كان هو الأحمر
وكنت أشوفه اول لما
أقولك مرة أحبك
وجبال الكبر ساعتها بقلبك
ومع اول كلمة حب اقولها
علطول تنهار
يمكن علشان خجلانه
يمكن مني تكون مكسوفه
لأني انا قولت ساعتها
لقلبك من حلو كلماتي
كلمة وكانت هيا بحبك
اما اللون التالت
كان هو الأبيض
وانا شوفته بوجهك
وبياضه بيشبه لون أقمار
فيه لمعه عيونك
صافي بريقه
وساكن فيها النور
وكأنه حبيبه يتغزل فيه
ليل ونهار
والشط التاني احكيلك عنه
وانا كنت لوحدي
عليه زعلان
وأكلم نفسي ولاحد يقولي
ليه زعلان
وحاير داير
ولا عارف أحكي لمين
لنجوم الليل اروح احكيلها
واقول اسرار
واقولها شايفه الحال
اتبدل لونه
ولازي ماكان
غابت عني واتغير حال
وطال الوقت
ومرت فيه شمس نهار
ولاليل انا شفتها فيه
ولا وعدها ليا صارله آوان
وقلت يئست خلاص
بس القلب وصوته ناداني
وعلطول خلاني
اتخطى جسور الخوف
وادور عنك هنا وهناك
ووسط جبال ليل ونهار
وصخور البعد
حسيتها بتجرح فيا
بس القلب لطول البعد
صار محتار
شك يخاطب فيه وجداني
وهمس يقولي صدقت كلامي
مش ممكن ترجع تاني
رديت أنا قلت بصوت وجداني
بصوت من قلبي
ال يحب بقلبه عمره مايهجر
وهجر حبيب لحبيبه أكيد
له تبرير وله أعذار
يمكن عني حجبها ظلام
يمكن كان لغيابها
همس شطان
وسوس ليها وقال
حبه لقلبك نساه وخلاص
بس رسالتي لقلبها كانت
بحبك وعمري لحبك
قلبي ماكان غدار
أكره نفسي وأحبك أه
بس لقلبك حبي هيفضل
زي الشمس بنورها الساطع
وسط نهار
وشكها فيا خيال
واكيد أوهام
ورجعت تاني زي البارح
تغني على الشط الأول
وكملت قصة حبي وحبك
وعيشت معاها
وباقي حياتي ان شاالله
بأجمل حال
بقلمي جمال القاضي
جمهورية مصر العربية