رئيس مجلس الإدارة
د/ نبيلة سامى
صحافة من أجل الوطن
( مجلة مصر )
( أحدث إصدارتنا)
الأربعاء 19 مارس 2025 9:55 م توقيت القاهرة
رئيس مجلس الإدارة
د/ نبيلة سامى
صحافة من أجل الوطن
( مجلة مصر )
( أحدث إصدارتنا)
أنا دكتورك الشاطر
وسماعتي بترقيكي
أنا اللي ليا 100 خاطر
على الآهه اللي ف عنيكي
.
أنا اللي دواكى يا أمي
أنا اللي ندرتلك دمي
فلو شوفتيه نزل سمي
و حني بيه غناويكي
دنا مجنونك العاشق
ولا اتمعشقش غير بيكى
.
...................
.
أنا فلاحك الفارد
دراعه ف الشتا و الحر
أنا صيادك المارد
و واخد مركبك للبر
.
أنا إبنك ياست الدار
أنا العامل و انا البحار
وانا اللي عندي م الأسرار
ف حبك كل يوم 100سر
.
أنا الفنان أبو غيه
يدندنلك و يشجيكي
أنا اللي ساقيكي حنيه
و ف عنيه مخبيكي
.
.
.....................
.
أنا الجندي وانا الظابط
على وعدك انا مرابط
أموت ولااشم يوم خوفك
وعهد عليا أفديكي
.
أنا القلب اللي ما اتهزش
عليكى العمر ما اتعزش
و روحي رهن لكفوفك
ولا فيه شيئ يكفيكي
.
أنا الطلقه اللي في سينا
وانا العين اللي ع المينا
عيوني صاحيه و أمينه
عشان ف الصبح اعديكي
.
......................
.
أنا يا أصيله قسيسك
وشيخ جامع حواريكي
بقيد ف الضلمه فوانيسك
و نتجمع في لياليكي
.
ف قلبك نجري كام لفه
و نحضن بعض ع الكفه
و جوه عنيكي ندفى
و بالمره .. ندفيكي
.
أنا تلميذك الناجب
عيوني صم عاشقينك
أنا الواد اللي متعاجب
بإنه حته من طينك
.
أنا وكراريسي و قلامي
ف حوشك دمنا حامي
وحوشك وقت ماتنامي
وبسم الله نغطيكي
.
أنا اللي عزتك فرضو
وانا اللي رملتك عرضو
وانا اللي مهما اعبش برضو
مسيري هندفن فيكى
إضافة تعليق جديد