تقصير الزوجة نتيجة لإهمال الزوج

بقلمي جمال القاضي
(بدون فصحى وبدون غضب )

سلوكيات والفاظ واتهامات سيئة من الزوج لزوجته، وابل من اللوم والعتاب والتوبيخ من الزوج لزوجته 
حوار نتحدث فيه بصراحه مفرطه  وبنفس طريقتنا  المعروفة في النقاش لكن هذه المرة مع الزوج وبدون استخدام الفصاحه في الكلام، نتحاور  ونتعمق في الحوار واتمنى ان لا يزعج من حوارنا الزوج لصراحتنا في القول والحديث .

ومعا نبدأ
ساعات كتير بنسمع توبيخ واهانة من الزوج لزوجته بكلمات ماينفعش ابدا ان يوجهها لها، من اول مايشوف شكل جسمها اتغير عن زمان، من اول ماتبدأ تهتم بطفلها ال محتاج لكل وقتها، من اول ماتهمل في شكلها ولبسها ونظافتها الخارجية، من اول مايكون ريحة ملابسها من روايح الطبخ والمطبخ، من اول مايجي الليل وزوجها يدخل يلاقيها نايمه قبل منه، من اول ماتبدأ تهمله شويه .

بنسمع الزوج يقول لزوجته الفاظ كتير جارحه لانوثتها، زي ايه ال انتي بقيتي فيه ده، جسمك زي برميل، ايه الترهلات ال عندك دي، ايه ريحة التوم والبصل ال فيك دي، بقيتي مهمله في نفسك وف لبسك  ومش مهتمية بنفسك ونظافتك ليه، ليه مش بتسألي عني زي زمان وتقولي مالك وعامل ايه في شغلك، ليه بتنامي بدري ولاسأله فيا، ايه التجاعيد والبقع ال في وشك دي، ايه الاكل ال ملوش طعم ده .

طيب متيجي كده نشوف ايه ال اتغير فيها ومين السبب فيه الاول وبعدين لو هيا السبب ابقى قول ال عايز تقوله عنها ولو السبب الاساسي فيك ياريت تراجع نفسك .

الاول كده زوجتك دي كانت مين الاول، مش دي البنت ال كتير حفيت عليها وسوقت عليها طوب الارض علشان توافق عليك، مش دي البنت ال كنت تتمنى منها تبص لشكلك وتضحك في وشك، مش دي البنت ال لما خطبتها كنت تتمنى تلمس ايدها وانت بتعمل اي حجه كده علشان تطلع انت وهيا لوحدكم مشوار وتمسك ايديك في ايدها وعايز تقول لكل الناس اه والله دي خطيبتي العسل ال ماشيه معايا دي، مش هيا دي برضه ال كنت تفرح اوي لما تتبسط منك علشان هديه بسيطه، مش هيا نفسها ال سهرت طول الليل تتكلم معاها في الفون وقت الخطوبه ومكنتش عايز تقفل التليفون علشان تفضل تسمع صوتها الحلو ال كتير اتغزل فيها وبجمالها كله.

طيب ايه ال حصل ومين السبب فيه
تعالى معايا هقولك واهمس بكلامي في اذنك وافتح قلبك ومتزعلش مني علشان هكلمك بصراحه والصراحه انا عارف انها هتوجعك وبتوجع انا عارف كده كويس .

ايه ال حصل
ال حصل في جسمها من ترهلات وزياده في وزنها بسببك، سببي انا، اه والله بسببك، عارف ليه علشان متعتك الشخصيه بجمالها في العلاقة الزوجية، مش عايز حمل تاني فكان لازم تاخد وسيله من وسائل منع الحمل، طيب اخدت اقراص منع حمل عملت ايه، دي عملت كتير فيها وكله علشان خاطر متزعلكش، جمعت  ميه تحت الجلد وكونت دهون كتيره في جسمها، دي كمان كانت السبب في انها بقى عندها ضغط وكوليسترول اه والله زي مابقولك، عملت كمان ترهلات في جسمها وشكلها اتغير، دي كانت مستعمله وسيله تانيه وهيا شريط منع الحمل، (اللولب يعني )  او لو كان له اسم تاني معرفوش، طيب ده عمل ايه، عمل مصايب اقولك عليها، كان بيسبب لها نزيف في الرحم وفضل ينزف لحد ماتم استئصاله وفقدت البيت ال كان فيه اطفالها ومعاه موت امل الانجاب مره تانيه لو لاقدر الله فقدت اولادها، ده عمل لها سرطان ثدي، ازاي ده، بيعمل والله سرطان ثدي لان فيه علاقه مابينه وبين الوسيله ده، ده كمان عمل قرحه في الرحم ومغص مكنتش عارفه سببه ايه والم في ظهرها وبطنها من الاسفل وكان بيموتها قبل نزول الدورة الشهرية وال حضرتك مش بتسمع لها ولابسأل عنها لماتشتكي من كل وجعها بسبب الوسيله ال بتستخدمها وال اتحملتها بكل مافيها من وجع علشان بس تتبسط معاها .

طيب البقع والتجاعيد ال في وشها
دول كانوا بسبب الحمل كمان لو مش عارف كده

طيب الاهمال في نفسها ونظافتها ونومها قبل منك مين السبب فيه

انت كزوج طبعا، انا اه انت، طيب ازاي ده
هقولك
حضرتك زيك زي اي زوج بيتمنى ان ربنا يرزقه بطفل ويفرح لما ينادي عليه ويقول بابا، بابا كلمه جميله وكلنا كان نفسنا نسمعها من زمان من اول زواجنا، طيب يامعلم، مين ال كانت بتسهر جنب الطفل طول اليل وانت نايم بصوت شخيرك العالي جنبها، مين ال كانت بتبكي طول الليل مابين رغبتها في النوم ومش قادره تنام وتسيب الطفل من غير رضاعه وغيار ملابسه، وبين تعبها طول النهار من الغسيل والتنظيف للبيت والطبخ ومذاكره للاولاد وتكمل بطلباتك كزوج وتدخل بيتك بالليل عايزها كمان تضحك في وشك ماشي من حقك لان البيت سكن والزوجه سكن كمان، 

بس سألتها مره وقلتلها  مالك، دخلت لاقيتها نايمه وانت عارف انها ميته من كتر التعب عملت لنفسك لقمه وسيبتها ترتاح، لاقيت ابنك ولابنتك الرضيعه بتعيط وزوجتك مريضه قلتلها ارتاحي انتي وانا هلاعب الطفل واعمله رضعه، لا طبعا، دا انت صحيتها من نومها وفضلت تهين فيها ويمكن قلتلها روحي في اي نصيبه نامي فيها بريحتك المعفنه دي بعيد عني انت والعيل ده علشان ارتاح منكم ومن شكلك .

طيب الاهمال في لبسها ونظافتها
مين السبب فيه، انت برضه، انا ليه، كل شويه تتهمني اتهام جديد، اه علشان التقصير ال عندك 

من كام سنه انت قلتلها خدي فلوس واشتري ملابس جديده، من كام شهر قلتلها خدي هاتي شامبوا ولامعجون اسنان ولا بارفان ولا يلا نطلع نغير جو مع بعض، ماهي ماتت جواها كل طموحاتها، موتت فيها انوثتها بكلام الاحباط ال بتسمعه منك كل شويه، يبقى مين السبب في شكلها ال مش عاجبك ولا ريحتها ولا نومها ولا ولا ،،،  

طيب اعمل ايه ياعم
بسيطه هلخصلها في كلمات
زوجتك دي بنت ناس واختك زيها بنت ناس وامك برضه بنت ناس، مش عايزك تعاملها غير انها بنت ناس، عايزه شوية اهتمام وشوية عطاء من فلوس ومشاعر واحساس ومتجيش عليها لان ال بيجي على ست بيظلمها وبيظلم نفسها قبلها، غير جو معاها، غير طريقة كلامك الجاف، حسن اسلوبك، براحه عليها في كلامك، راعي صحتها وحس بيها واتقي ربنا فيها ولايكرمهن الا كريم ويكفي ان الرسول عليه الصلاة والسلام وصانا على النساء ويكفينا رسولنا ان يكون لنا قدوة في تعامله مع زوجاته امهاتنا وامهات المسلمين .

فلو كان من الزوج حسن المعاملة، لكانت الزوجة السكن للزوج، يشعر براحة وهدوء حين يدخل اليها ويرى على وجهها ابتسامة تعكس رضاها عنه .